Садије Алити е родена во село Глоѓе, општина Теарце. Повеќе од две децении работи како професорка по албански јазик и книжевност во Теарце, но таа исто така е преведена поетеса и учесничка во повеќе книжевни настани, како и граѓанска активистка. Таа исто така работела како новинарка за весникот “Факти”, вклучувајќи го и периодот на војната во 2001 година.
Интервјуто е снимено во 2020 година.
Ацо Јованоски Реган (1951-2024) работниот век го поминал како професионален возач, во најголем дел во транспортната фирма „Пелагонија“ од Прилеп. Бил возач на еден од автобусите во конвојот на АРМ кој бил нападнат кај Карпалак на 8 Август 2001.
Интервјуто е снимено во 2019 година.
Џелал Зејнели е роден во 1954 година во Тетово. Работел како професор по албански јазик и книжевност во гимназијата во Тетово. Тој исто така работи како преведувач, а бил и заменик директор на новинската агенција МИА (2002-2006). Автор на лингвистички дела објавени во Македонија и во странство.
Интервјуто е снимено во 2020 година.
Диме Ристески е роден во 1971 година во Прилеп. Учесник е во војната во 2001 како дел од Армијата на Република Македонија. Се наоѓал во конвојот нападнат на Карпалак на 8 Август 2001 година и е ранет.
Интервјуто е снимено во 2019 година.
Немаш доверба веќе, ниту во… да речам… глуп термин: нашите – вашите, меѓутоа така е, ниту во своите, ниту во никој друг. Функционираш некако поинаку, свесен си дека нема роднина, свесен си дека нема комшија, свесен си дека си сам и свесен си дека ќе туркаш како умееш и знаеш и те боли тоа бидејќи ние сме суштества на кои им треба, нели, и пријател и комшија и човек кој ќе ти дојде, ќе ти помогне и збор еден да ти каже добар…
… те прашуваат: „Зашто не се вратите? Па кога мислите да се вратите, значи, па, зарем сè ќе оставите?“ Значи те прашуваат како… излегуваше од контекстот на муабетот дека ние сме самите виновни за тоа што се случи.
… остај што беше студено, туку се тресевме од страв затоа што не знаевме што може од назад да ни дојде затоа што беше многу голема колона…
… некои увидоа да кажам вистина. Што е вистина? А вистината е релативен поим, беше за секој учесник, некои колабираа психички, некои колабираа физички. Имаше луѓе што после директен вооружен судир после 10-на дена, има, мислам знам, еден, така, познаник што почина од срцев удар, доживуваа некои сломови, имаше бракови кои се растураа заради тоа, имаше луѓе што станаа толку тврди што… што… што да се случи око него нема да трепне, а има некои коишто плачат на секаква ситница.
Бранејќи си ги интересите и едните и другите, во средина беа припадниците на Ромите.
Никад не можам. Сам на себе не можам да го опростам а камоли на друг да го опростам. Самиот сум виновен, викам, зашто да се случи токму тое у родниот крај мој.